Sambhal Jao is a Social Issues Based Novel by Hina Javed Published in Khawateen Digest December 2025.
ناول: سنبھل جاؤ از حناجاوید
خواتین ڈائجسٹ دسمبر ۲۰۲۵
تبصرہ نگار: اقراء عنایت
بعض اوقات کچھ لوگ خود کو اتنا کامل سمجھنے لگتے ہیں کہ ان کی نظر میں ہر دوسرا انسان حقیر اور کمتر دکھائی دیتا ہے، اور ان کے نزدیک صرف وہی خود عقل مند اور باشعور رہ جاتے ہیں۔
کچھ ایسا ہی معاملہ نازیہ کے ساتھ بھی پیش آیا۔ وہ بچپن ہی سے نہایت باشعور، سمجھ دار، پڑھائی میں ہوشیار اور گھرداری میں اس قدر سلیقہ مند تھی کہ اس کے والدین ہی نہیں بلکہ نانی تک اس کی تعریف کیے بغیر نہ رہتی تھیں۔ اس کے کزنز کا ہر وقت نازیہ سے موازنہ کیا جاتا، جس کے نتیجے میں وہ رفتہ رفتہ لوگوں کی نظروں میں ایک ناپسندیدہ شخصیت بنتی چلی گئی۔
مگر اس کے والدین کے لیے وہ نہایت اہم تھی؛ گھر کا ہر فیصلہ اس کی رضا سے ہوتا تھا۔
تاہم جب یہی “کامل” بیٹی سسرال والوں کے نزدیک “حد سے زیادہ ہوشیار” اور “اوور اسمارٹ” کہلانے لگی تو نازیہ کے لیے یہ بات ناقابلِ برداشت ہو گئی۔ اس نے کبھی جھکنا سیکھا ہی نہیں تھا، اور یہی ضد اس کے گھر کو بسانے میں سب سے بڑی رکاوٹ بن گئی۔
کئی سال اکیلے گزارنے کے بعد اسے یہ احساس ہوا کہ تنہائی جس میں انسان اپنی مرضی کا مالک اور بظاہر آزاد ہوتا ہے اس زندگی سے کم تر ہے جس میں اگرچہ معمولی رنجشیں ہوں، مگر بالآخر یہی رشتے مشکل وقت میں انسان کے کام آتے ہیں۔
یہ کہانی دراصل اس تلخ حقیقت کی عکاسی کرتی ہے کہ کمال پسندی اگر عاجزی سے خالی ہو تو رشتوں کو کمزور کر دیتی ہے، اور انسان کو دیر سے ہی سہی، مگر یہ سیکھنا پڑتا ہے کہ زندگی صرف درست ہونے کا نام نہیں، بلکہ ساتھ چلنے کا ہنر بھی مانگتی ہے۔
