Sirf Tumhari Bilqees is a Family Drama | Arrange Marriage Based | Digest Based Social Romantic Novel by Mansha Mohsin Ali Published in Kiran Digest March 2026.

صرف تمہاری بلقیس از منشاء محسن علی
تبصرہ نگار: اقراء عنایت
کرن ڈائجسٹ مارچ ۲۰۲۶

بلقیس، کارنس پر رکھی ہوئی ایک بھولی بھٹکی ہوئی معمولی سی چیز، مگر کون جانے؟ کس کو خبر؟
وہ کیا تھی؟ وہ کیوں تھی؟

بلقیس ایک عام شکل و صورت کی، مگر زندہ دل لڑکی تھی۔ اس کی شادی مراد سے ہوئی، لیکن شادی کے کچھ ہی دن بعد مراد واپس سعودی عرب چلا گیا۔ وہ یوں گیا کہ پورے تیرہ برس تک واپس نہ آیا۔ حقیقت یہ تھی کہ اسے کبھی بلقیس کی قدر ہی نہ تھی۔ وہ اکثر سوچتا کہ بلقیس اس کی ہم پلہ نہیں اور نہ ہی اس قابل ہے کہ اس کی شریکِ حیات کہلائے۔ چنانچہ وہ اسے اپنے گھر والوں کے رحم و کرم پر چھوڑ کر چلا گیا۔
سالہا سال کی سخت محنت اور مشقت کے بعد جب مراد واپس وطن لوٹا تو ایک حیران کن منظر اس کا منتظر تھا۔ گھر والوں نے ہمیشہ یہی بتایا تھا کہ اس کی بیوی بدسلیقہ ہے اور اس نے بچوں کی تربیت بھی درست نہیں کی۔ مگر حقیقت اس کے بالکل برعکس نکلی۔
مراد یہ دیکھ کر دنگ رہ گیا کہ اسی عورت نے نہ صرف بچوں کی بہترین تربیت کی تھی بلکہ خود بھی تعلیم جاری رکھ کر اپنی شخصیت کو یکسر بدل ڈالا تھا۔ وہ پہلے سے زیادہ باوقار، سمجھدار اور مضبوط بن چکی تھی۔
ادھر مراد کے بیشتر رشتہ دار وہی تھے جو اس سے صرف پیسوں کی توقع رکھتے تھے۔ انہیں اس کی محنت، اس کے احساسات یا اس کی جدوجہد سے زیادہ دلچسپی اس کے لائے ہوئے تحائف میں تھی۔
لیکن بلقیس جیسے لوگ دنیا میں بہت کم ہوتے ہیں۔ وہ سونے کی اینٹوں یا دولت کی طلب گار نہیں ہوتے۔ مگر بلقیس جیسے لوگ نایاب ہوتے ہیں جو سونے کی اینٹوں یا پیسوں کے طلب گار نہیں ہوتے بلکہ صرف کھجور اور زم زم کے پانی سے ہی خوش ہوجاتے ہیں۔

‎ہم اکثر لوگوں کو ان کے ظاہر سے پرکھ لیتے ہیں اور جلد ہی ان کے بارے میں بدگمان ہو جاتے ہیں، حالانکہ کسی انسان کی اصل قدر اس کے کردار، صبر اور ذمہ داری نبھانے کے انداز سے ظاہر ہوتی ہے، نہ کہ اس کی ظاہری حیثیت سے۔ بلقیس کا کردار اسی حقیقت کی خوبصورت مثال ہے۔
مصنفہ نے اس کہانی میں ان لوگوں کی کٹھن اور مشقت بھری زندگی کی جھلک بھی پیش کی ہے جو پردیس جا کر روزی کماتے ہیں۔ سالہا سال گھر اور اپنوں سے دور رہ کر محنت کرنا، تنہائی اور جدائی کا بوجھ اٹھانا، اور پھر بھی اپنے خاندان کی بہتر زندگی کے لیے جدوجہد جاری رکھنا ایک ایسی حقیقت ہے جسے اس تحریر نے نہایت سادہ مگر مؤثر انداز میں بیان کیا ہے۔

Sab Sitare Tum Rakh Lo Is a After Marriage Based Novel by Mansha Mohsin Ali Published in Pakeeza Digest September 2025.

ناول: سب ستارے تم رکھلو از منشا محسن علی
شائع شدہ: پاکیزہ ڈائجسٹ ۲۰۲۵

تبصرہ : اقراء سومرو
روحانہ عرف روحی ایک گہری سانولی رنگت کی لڑکی تھی جسے پودوں سے بے انتہا محبت تھی۔ سادہ اور پُرلطف لڑکی، مگر ہمارے معاشرے کا یہ کڑوا سچ ہے کہ ایسے رنگ کی لڑکیوں کو ہمیشہ طنز، طعنے اور مذاق کا نشانہ بنایا جاتا ہے۔ انہیں ہمیشہ یہ احساس دلایا جاتا ہے کہ وہ کمتر ہیں۔
یہ سوچے بغیر کہ ایسی لڑکیاں کس طرح ذہنی دباؤ اور احساسِ کمتری کا شکار ہو جاتی ہیں۔
مگر روحانہ کے والدین کا کردار مجھے بے حد پسند آیا، خاص طور پر روحانہ اور اس کی امی کی محبت بھری وابستگی، اور اجالا (روحانہ کی بہن) اور اس کے ابا کا۔ روحانہ کی امی اور ابا کی ہلکی پھلکی نوک جھونک نے ناول میں جیسے جان ڈال دی۔
کہانی میں ایک ایسا موڑ بھی آتا ہے جو قاری کو چونکا دیتا ہے۔ لیکن اگر وہ ابھی بتا دیا جائے تو مزہ کرکرا ہو جائے گا۔یہ راز تو آپ کو ناول پڑھنے کے بعد ہی معلوم ہوگا۔
یہ کہانی صرف ایک لڑکی کی نہیں، بلکہ ان تمام دلوں کی ترجمان ہے جو رنگ و نسل کے پیمانوں پر پرکھے جاتے ہیں۔ ناول پڑھ کر اپنی رائے ضرور دیجیے گا۔